1.జీవితం అంటేనే వ్యాపారమట...
జీవితంలో ఆదర్శాలూ, భావుకతలూ
అన్నీ ఉత్త చెత్త ట...
టైం ఈజ్ మనీ ట...
ఇదీ నేటి తరానికి ప్రతినిధి, ప్రతిభా వంతుడు గా కొనియాడ బడుతున్న ఒక వ్యక్తి అభిప్రాయం...
"ఇప్పుడు అంతా ఇదే ధోరణి అక్కా!" అంది నా చిన్న నాటి స్నేహితురాలు ఒకామె...
అక్కడికి' ఔనని' అన్న నేను...
రాత్రి నా ఏకాంతంలో 'నాకు ఇక ఉగాదులు, ఉషస్సులు లేవు'...అని కృష్ణ శాస్త్రి గారిలా ఒక నిట్టూర్పు విడిచి ...
మళ్ళీ తేరుకుని...నా గతం లో...
మల్లెలతో వసంతం, చేమంతులతో హేమంతం,వెన్నెల పారిజాతాలు, వానకారు సంపెంగలు అన్నీ గుర్తు వచ్చి...
అప్పటి ఆ అందాలు...
చిక్కని ఆ బంధాలు...
గుండె గదిలో సడి చేసి ...
ఆ సందడి కి వడి వడిగా...
ఇలా ఉండబట్టక ఇక్కడ గోడ మీదకి దూకి...
ఈ ఉదయం మీ ముందుకి...
కానీ మీరైనా క్షణ మాలోచించి చెప్పండి...
జీవితం క్షణికమే...
కానీ ఆ క్షణం ఆ జీవికి తన మనసులో శాశ్వతమే కదా!!
నిజమే...
కాలంలో రుతు శోభలు, జీవిత కాలం లో రసానుభూతులు తాత్కాలికమే...
అయితే మాత్రం...
ఆ వచ్చే, పోయే అనుభవాలు మిగిల్చే స్మృతి పరిమళాలు తుది వరకూ మదిలో...
అవి నీ ఏకాంతంలో నీలోనే, నీతోనే...
ఏ కాసులు కొనలేని...
ఏ లెక్కలకు చిక్కబోని
చక్కని వూసులు చెబుతూ
చిక్కని ఊహలు ఊరిస్తూ
వాటి సురాగ గీతాలతో మనసు తుళ్ళిస్తూ...
మేటి సుదూర గగనాల వైపు నిన్ను మళ్ళిస్తూ
శిశిరం లో వసంతాన్ని పూయిస్తూ;
రేపు లింకెంతో కాంతి మయం అనిపిస్తూ...
ఇదంతా కేవలం వ్యాపారంతో సాధ్యమా??
ఏ ఆదర్శం, ఏ భావుకత లేని జీవితాలకి...
ఇవేవీ చెప్పినా అర్థం కావు ...
పైసల తో పరమార్ధాలు పట్టు బడవు.
కేవలం కాసు తోనే కథ అంటే...
జీవితంలో జీవం వుండదు.
జీతం ఏమి చేసినా ఎలాగూ మిగలదు.
నేటి తరాల ది అయోమయం.
ఇది వారు తమను తాము కోల్పోతున్న వైనం.
కాసుల సుడిలో మనిషి ఈ వూపిరి సలపనితనం
విపణి వీధిలో మనికి కి ఇది నిలువెత్తు శూన్యం.
నేడు అందుతున్న దేమిటి?
రేపు పొంద బోయేది ఏమిటి?
అనే ప్రశ్నలు యువత ఎవరిని వారు అడిగి
వారి జీవిత మార్గాలు ఎంచుకోవాలి అని నాకు అనిపించిన మాట వాస్తవం. స్పందనలు కరవైన బతుకులు ఎండిన మోడులు అని అరిచి చెప్పాలని పించింది.
అయితే ఈ సత్తెకాలపు సత్తెమ్మ ని ఈ రోజుల్లో వినే దెవరు ??
23.09.2025
కామెంట్‌లు లేవు:
కామెంట్‌ను పోస్ట్ చేయండి